विद्या बालन हे नाव घेतलं की डोळ्यासमोर येतं ते तिचं अस्मानी सौंदर्य. साड्या, दागिने, गजरा यात ती जेवढी खुलून दिसते तेवढं क्वचितच एखादी दुसरी अभिनेत्री दिसत असेल. विद्या सोशल मीडियावर बऱ्यापैकी सक्रीय आहे. त्यातही तिला रील्स करून शेअर करायला आवडतात. तिच्या इन्स्टाग्राम पेजवर नजर मारली तर अनेक मजेशीर रील्स दिसतात. सध्या तिला मराठी रील्सचं वेड लागलं आहे.
विद्याने नुकताच ‘चला हवा येऊ द्या’ कार्यक्रमातील कुशल बद्रिकेचा एक विनोद डब करून शेअर केला. यात भाऊ कदम कुशल बद्रिकेला विचारतो की, ‘एका व्यक्तीला शिंका येत असतील तर तुम्ही त्याला कोणतं औषध द्याल?’
त्यावर भाऊ कदम म्हणतात, ‘मी त्याला आधी जुलाबाचं औषध देईन आणि मग सांगेन आता शिंकून दाखव.’ भाऊ कदम आणि कुशल बद्रिके यांचं सवत माझी लाडकी सिनेमावरचं स्कूप स्कीट खूप गाजलं होतं. याचमुळे विद्यानेही पुन्हा त्यावर रील करायला पसंती दिली.
विद्या फार चांगलं मराठी बोलते हे फार लोकांना माहीत नाही. तिच्या बहिणीचा नवरा मराठी असून त्यांच्यासोबत विद्या मराठी बोलण्यालाच पसंती देते. अशात तिच्या मराठी चाहत्यांना अभिनेत्रीचा हा रील आवडला असणार यात काही शंका नाही.
विद्याच्या या व्हिडिओवर मराठमोळी अभिनेत्री मृणाल ठाकूरने, ‘हाहाहा… किती क्यूट’ अशी कमेंट केली. तसेच इतर अनेक सेलिब्रेटींनी यावर कमेंट केल्या.
दरम्यान विद्या लवकरच अनू मेनन दिग्दर्शित ‘नियत’ सिनेमात दिसणार आहे. सध्या या सिनेमाच्या चित्रीकरणाचं काम सुरू आहे. याआधी विद्याने ‘शेरनी’ आणि ‘जलसा’ सिनेमात काम केलं. यात तिने एका पत्रकाराची भूमिका बजावली होती. पण दोन्ही सिनेमांना फारसं यश मिळालं नाही. त्यामुळे विद्याच्या आगामी सिनेमाकडून प्रेक्षकांना फार अपेक्षा आहेत.
