रवीना टंडन सोशल मीडियावर एकाहून एक उत्तम पोस्ट शेअर करत असते. कधी ती चाहत्यांना तिच्या प्रवासाची झलक दाखवते तर कधी ती स्वतःचे नवनवीन स्टाइल स्टेटमेन्ट दाखवत असते. पुन्हा एकदा तिने असा एक व्हिडिओ शेअर केला, ज्यानंतर ती अडचणीत आली. आता तिच्यावर चौकशीही सुरू झाली आहे.
बॉलिवूड अभिनेत्री रवीना टंडन सोशल मीडियावर खूप सक्रिय असते. ती जिथे जिथे प्रवास करते तिथून तिचे व्हिडिओ आणि फोटो पोस्ट करत असते. मात्र आता याचमुळे ती अडचणीत आली आहे. वृत्तानुसार, सातपुडा व्याघ्र प्रकल्पाच्या अधिकाऱ्याने सांगितलं की, सफारीदरम्यान ती कथितपणे वाघाच्या जवळ जात होती. आता या प्रकरणाची चौकशी सुरू करण्यात आली आहे.
खरंतर, रवीनाने जीपचा एक व्हिडिओ ट्वीट केला आहे. ज्यामध्ये ती वाघाच्या जवळ जाताना दिसत आहे. कॅमेऱ्याच्या शटरचा आवाज क्लिपमध्ये ऐकू येतो आणि राखीव भागात एक वाघ त्यांच्याकडे ओरडताना ऐकू येतो.
आता रवीना टंडनवर होणार कारवाई
पीटीआयच्या वृत्तानुसार, वन उपविभागीय अधिकारी (एसडीओ) धीरज सिंह चौहान यांनी मंगळवारी, २९ नोव्हेंबर रोजी सांगितलं की, वरिष्ठ अधिकार्‍यांच्या सूचनेनंतर त्यांनी कथित घटनेची चौकशी सुरू केली आहे. ते म्हणाले की, २२ नोव्हेंबरला रवीना कथितपणे तिच्या कारमधून वाघापर्यंत पोहोचली होती. हे पाहिल्यानंतर आता अधिकाऱ्याने चालक व तेथे ड्युटीवर असलेल्या अधिकाऱ्यांना नोटीस देऊन त्यांची चौकशी करण्यात येणार असल्याचं सांगितलं.
रवीना टंडनने आवाज उठवला
रवीनाने तिच्या सोशल मीडिया हँडलवर सातपुडा व्याघ्र प्रकल्पाच्या प्रवासाचे फोटो शेअर केले. तिने वाघांचे फोटोदेखील शेअर केले होते जे तिने क्लिक केले होते. रवीनाने या महिन्याच्या सुरुवातीलाही एक ट्वीट केले होते. यानंतर, भोपाळ येथील वन विहार राष्ट्रीय उद्यानाच्या अधिकाऱ्यांनी उद्यानातील वाघांवर दगडफेक करणाऱ्या काही बदमाशांच्या विरोधात तपास सुरू केला.
