स्वामींवर ज्याची नितांत श्रद्धा, भक्ती आहे त्यांना त्यांच्या दिव्यत्वाची अनुभूती वेळोवेळी मिळतच असते. मराठी सिनेसृष्टीतील अनेक कलाकार हे स्वामीभक्त आहेत. त्यामुळे त्यांनाही वेळोवेळी त्यांची प्रचिती येत असते. अशाच एका अभिनेत्रीला आलेला स्वामींचा अनुभव तिने प्रेक्षकांसोबत शेअर केला आहे. ही अभिनेत्री आहे समिधा गुरु. समिधा नुकतीच ‘लवंगी मिरची’ या मालिकेत दिसली होती. तिची मुलगी लहान असतानाचा हा किस्सा तिने शेअर केला आहे. समिधा ही लेखक, अभिनेता असलेल्या अभिजित गुरू याची पत्नी आहे. त्यांची एकुलती एक मुलगी दुर्वा हिच्या बाबतीत हा अनुभव त्यांना आला होता.
हा अनुभव सांगत समिधा म्हणाली, ‘दुर्वा जेव्हा २ महिन्यांची होती तेव्हा तिचा हात डिसलोकेट झाला होता. हाताचं हाड सरकलय असं जाणवताच आम्ही खूप घाबरलो. सर्वात अगोदर त्यांनी डॉक्टरांकडे धाव घेतली. त्यावेळी रात्रीचे दोन अडीच वाजले होते. रात्रभर दोघे इकडेतिकडे भटकत होतो की कोणीतरी अस्थीव्यांगोपचार (ऑर्थोपेडिक) भेटेल आणि त्यातून तिला बरं करू शकेल. त्यावेळी मनात विचार आला की “योग्य डॉक्टर भेटले की तिच्या हाताला प्लास्टर लावू शकू. काहीतरी घडेल पण तो अर्धा तास एक तास सलग आम्ही शोधाशोध सुरू ठेवली. शेवटी दुर्दैवाने कुठलाच दवाखाना उघडा नव्हता, कुठलाही सर्जन नव्हता.’
पुढे समिधा म्हणाली, ‘तेव्हा घरी परत आलो आणि फक्त तिचा हात हातात घेऊन रात्रभर नामस्मरण करत बसलो. आमचं असं झालं की जे काही करतील ते स्वामीच करतील, तुम्ही बघा आता स्वामी काय करायचं ते, असं म्हणत आम्ही तिघेही कसेबसे झोपी गेलो. पण सकाळी उठले तेव्हा दुर्वा हसत खेळत उठली आणि आम्ही दोघेही तिच्याकडे चकीत होऊन बघायला लागलो. त्यादिवशी तिला घेऊन पुन्हा दवाखान्यात गेलो.
तेव्हा डॉक्टरांनी तिला तपासलं आणि हात नॉर्मल आहे असं सांगितलं. कसलाच प्रॉब्लेम दिसत नाहीये आणि प्लास्टर वगैरे लावायची काहीच गरज नाहिये हे ऐकून आम्ही निश्चिंत झालो. स्वामी पाठीशी होते आणि त्यांनीच ते केलं होतं. आजतागायत स्वामी आमच्या पाठीशी उभे आहेत अशी श्रद्धा आमची आहे.’ समिधाने स्वतः हा अनुभव सांगितला होता.
